Gruppa da giug
Ils habitonts ils pli pigns han la pusseivladad da visitar la gruppa da giug a Schlans. Manada da Rita Caduff s'entaupan ils affons mintg'jamna en l'anteriura casa da scola per giugar, zambergiar, far gimnastica e dapli. Era ina gruppa d'uaul che vegn realisada a Trun fa part dalla purschida. E cun il program "Wunderfitz und Redeblitz" eis ei perfin pusseivel d'emprender romontsch a moda ludica.
Scola elementara
La scola primara da Schlans ei vegnida menada passa 147 onns. Gl'onn 2007 eis ella vegnida serrada per munconza da scolars. Dapi lu frequentan tut ils affons da Schlans la scola populara a Trun che vegn menada dapi gl'onn 2012 ensemen cun Sumvitg sco "Consorzi da scola Sumvitg-Trun".
Gimnasi
Tgi che vul frequentar il gimnasi sa far quai naven da Schlans a Mustér ni a Cuera. El gimnasi dalla claustra da Mustér cun internat san ins frequentar schibein il gimnasi bass sco era il gimnasi superiur.