Revista dalla historia da Schlans
L'anteriura vischnaunca da Schlans era situada denter las vischnauancas da Trun e Breil. Ils cunfins ensiviars eran tochen il Cavistrau Grond e Péz Tumpiv. Il liug schai alla spunda sulegliva dalla vart seniastra dil Rein posteriur.Il pli ault punct: 3´220 m.ü.M Cavistrau-Pign
Pli bass punct: 910 m.ü.M Fanels
Surfatscha: 883 ha
Habitonts (2010) 82
Lungatg (sursilvan)
Confessiun pil pli catolic
Cumin: Cadi
District: Rein posteriur
Pei da taglia: 130% dalla t. cant. sempla.
Classa da finanzas: 5
Legislativa: radunonza communala
Executiva: suprastonza
Vischn. vischinontas: Trun, Breil/Brigels
Anteriur uoppen da vischnaunca
Il funs ei cotschens. Sogn Gieri, cun nimbus (gloriola) d'argien e vestgiu verd cavalchescha in cavagl d'argien che mazza in drag verd. Da sia vard dretga la crusch d´argien da sogn Andriu,
l'enzenna caracteristica dalla Claustra da Mustér.
Quella crusch distingua nies uoppen dad auters uoppens da sogn Gieri.
Colurs da vischnaunca:
tgietschen - alv - verd
(ord: Wappenbuch des Kantons Graubünden)
Il num Schlans
Il num Schlans ei da derivonza latina. El Testament da Tello vegn ´Selaunum´ menziunaus. Quei plaid dariva dil salictum che munta salisch. La ragisch sal lai aunc declarar il num Schlans autramein: ins savess metter en connex il num Schlans cun paliu. Nums da praus che van anavos sin la ragisch sal vegnan era avon ordeifer il territori roman da pli baul ed ein da derivonza pli veglia. Etymologicamein fuss quei forsa plausibel. Persuenter tschontschan ils praus humids entuorn vischnauca.
La conolisaziun da Schlans
Gia el temps preroman era il territori entuorn la tuor da Sais enconuschents. Ils nums da praus en gliez contuorn laian denton buca supponer in néz agricol. Entgins auters nums da praus, la topografia e la vischinonza da caltschina barschada, confirman las pretensiuns che Camartgeis era in center dil cult da crap, denton in nunhabitau. Sch´il liug da Schlans era habitaus, ni vegneva pasculaus el temps preroman, lu plitost sin la terassa da Razeil, egl ost dil vitg.
Perquei che la gronda part dils nums da praus a Schlans darivan dil latin, eis ei da supponer ch´ il vitg era buca habitaus avon la romanisaziun.
La tuor da Sais
La ruina Sais sesanfla sper la caplutta sur il vitg ed ei sut alla protecziun da monuments.
Ella ei construida en ina fuorma quadrata. La vart mesira 8.5m. Igl edifeci ha treis alzadas. La miraglia da 2 tochen 2.5m grossezia ei fatga ord crappa pauc luvrada si ; sulettamein las cantunadas ein martelladas bein. L´entrada ei ella tiarza alzada.
Igl administratur digl uestg sin la veglia cuort episcopala da Selauno vegn ad haver fundau ella entuorn igl onn 1000 forsa era avon.
Cun scalas e sugas entravan ins en la tuor che surveva a tuts ils habitonts cun lur raubas sco refugi. Las 4 alas tetg schischevan sin blocca. Sco avdonza stabla ha quella tuor mai surviu. Las duas empremas alzadas fuvan quasi el stgir. La tuor fuva buca in liug da sgarschur, mobein in center, nua che purs e mistergners s´entupavan.
Il casti da Salons ella Val Casti
Sur igl uaul denter Schlans e las Pradas secattan aunc restonzas d'in casti. La ruina statt sin in grep da tuf. Ils nobels da Schlans vegnan ad haver eregiu quest casti che era dimora signerila dalla famiglia da Waltherius da Sellaunes. Lezza schlatteina nobla ei morta ora gia avon ils 1300.
Il casti fuva era in schurmetg per il viandont naven da Cartatscha a Schlans via Plaids a Breil. La suletta entrada era orientada viers nord. In foss da varga 10 meters ladezia e 6 meters profunditad segirava quella vart. Ina punt uneva il casti cun la Prada. En la cantunada sid-ost sesalzava ina tuor. Ins astga supponer ch'ina caplutta eri leu.
Cavazzins historics en successiun cronologica
Pil pli ei vegniu priu fatgs historics ord la broschura ´Ord la historia e cultura da Schlans´, da Giachen Antoni Pfister, Neuhausen 1931 e da "Nums locals da Schlans" rimnai, descrets e commentai da Leo Hug, 1998.2018
Ina gronda lavina rumpa ora sut ils Cavistrai ils 22 da schaner. Ella destruescha igl Uaul Miez e devasta las tegias veglias d'alp. La lavina fuola via dalla Val Farbertg giuadora tochen ca. 200 m sur la via da Schlans -Trun2016
La stizun dil Volg ei suenter varga 50 onns historia. La davosa stizun siara sias portas.2012
Fusiun da vischnaunca Schlans e Trun. Niev secloma la vischnaunca politica Trun. Schlans ei dacheu naven ina dallas fracziuns da Trun.2011
Suenter onns datti puspei ina ustria el vitg. L'ustria da curtgin Chispàcius beneventa indigens ed jastesr per star da cumpignia e guder ina tschavera.2008
Finiziun dallas lavurs vid la dustonza el vitg.2007
Memia paucs scolars La scola cumplessiva da Schlans siara las portas suenter 147 onns (1860-2007).2004
Werner e Renata Pfister ein ils davos postanents. Il biro da posta siara sias portas. Las casadas vegnan dacheu naven survidas da Trun anora. Il survetsch da casa per pagaments e spediziuns vegn offerius da niev.2002
Ils 16 da november 2002, suenter ferma mallaura che ha cuzzau plirs dis, sedistacca spontanmein ina bova a Surseivs. Ella destruescha dabia cultira, baghetgs ed infrastructura. La bova fenda il vitg da Schlans en duas parts. Il pilot da helicopter Marcus Levy, ch´enconuscha bein Schlans, ughegia da sgular da relaziuns d´aura fetg schliatta. Tras la spessa tschagera evacuescha el cun agid dalla collona d´agid ed Albert Pfister habitonts ord il prighel. In di pli tard vegnan tuts habitons evacuai cun il helicopter a Breil. Sulet ils purs restan en vitg per pavlar lur animals. Per grond cletg e ventira e grazia alla prudientscha dil president da vischnaunca, Reto Pfister, ha quella catastofa custau negins morts ni blessai.1999
Ils 13 d'uost 1999 ei vegniu concludiu la meglieraziun generala sil territori dalla vischnaunca da Schlans.1987
Ina gronda bova sederscha tras la Val Plaunca a val e caschuna gronds donns. Dall'Alp Schlans tochen giu Rein vegn erigiu rempars solids che dueien segirar il territori.1984
Ils 9 da fevrer vegn la vischnaunca da Schlans tuccada d´ina gronda lavina. Ella destruescha 19 baghetgs sillas Pradas cumplettamein e sdrappa naven grondas part digl uaul.1939
Ils 28 d'uost, la sera avon la mobilisaziun generala, brischan pliras casas el vitg giu tochen sils mirs.1922
Igl avrel sedistaccan ca 50 meters cubics dil grep sper la resgia e sederschan a val. Miraculusamein seferma la massa da grava sper ina casa senza far donn..1855
Ina gronda bova sedistacca ella part sura dallas Pradas (Prada dalla bova). Per cletg meina in carpun sigl ault da Pradamiez naven il material en direcziun ost. Ei resulta denton ina profunda cavorgia tochen a Planatsch e da leu giu a Razeil tochen tiel Rein. Senza quei crap fuss la bova probablamein ida directamein giu sil vitg e vess destruiu quel per gronda part.1851
Schlans vegn attribuiu sco siatavla vischnaunca al niev cumin dalla Cadi.1817
La notg dils 10 da mars sedistacca ina lavina sil Cavistrau Pign e sesparta en treis tochen quater bratschs che sederschan da Tiraun dadens, Tiraun dado e sur il Plaun Sincera giuado. Entirs uauls da Trun e Schlans e plirs clavaus vegnan scuai naven. Era dil Tumpiv sedistacca ina lavina ed in bratsch vegn via Muletg tochen giu ella Val Ferberg. In secund bratsch vegn sur Pradaplauna, destruescha igl uaul da Surseivs e seferma la finfinala sigl ault da Pradamiez.1803
Culla mediaziun daventa il cumin da Rueun, dil qual era Schlans fa part, dil tuttafatg independents.1776
Il quartier Camartgois daventa unfrenda dalla flommas. Il fiug rumpa ora sur la fontauna actuala a Cantieni. Damai che tut il vitg era en prighel, hagi sur Martin Schmid purtau la monstranza si Surfuorns. Sinaquei seigien las flommas seviultas encunter Camartgois.1631
Ils 21 da settember rumpa la pestilenza or a Schlans. 82 persunas mieran. Che mo 13 hagien surviviu, ei denton ina detga.1506
Puspei vegn la vischnaunca da Schlans menziunada en connex cun carplinas partenent la pasculaziun. Perquei han ins pli tard (1535) schau decider ina cumissiun cul Landrichter Berther da Mustér, Moritz Henny, "Amman ob dem Übersaxen" e Landrichter Jochberg.1472
Igl uestg Ortlieb von Brandis cumpra il signeradi da Munt s. Gieri, senza la Renasca e las minieras da Rueun per 1200 florins. Suenter paucs meins ei il Zoller enriclaus da sia vendita ed igl avat dalla claustra da Mustér, Johannes de Schöneck, che paga 1800 florins, survegn il signeradi. Sut la giurisdicziun dalla claustra ein quels da Schlans lu restai tochen il temps dalla mediaziun.1459
Gieri Brun da Razén, il davos barun da Razén, miera. Sia sora, Ursula von Hohenberg, fa si il segneradi da Munt s. Gieri a siu fegl Josias von Zollern.1378
Per 1000 renschs cumpra Ulrich II, il Brun da Razén, il casti dad Elisabeth von Haldenstein, niaza da Heinrich de Montalt, ed integrescha el en siu signeradi da Munt s. Gieri (Jörgenberg).1357
Heinrich de Montalt surdat a siu quinau, barun Walter da Belmont, il casti da Schlans cun tut ils beins e dretgs. El decuors dil 14avel tschentaner ei il casti da Salons vegnius bandunaus. Il num "Val Casti" regorda aunc alla tuor.1220
Emprema attestaziun dalla veglia famiglia dils nobels da Schlans: Waltherus de Slauns (1220 -1275), canoni a Cuera. La famiglia dils da Schlans ei morta ora el 14avel tschentener. Schlans ei lu ius alla famiglia da Grünenfels, che veva lur residenza a Vuorz. Tras maridaglia ei Schlans lu vegniu en possess dalla famiglia de Montalt.1185
Papa Luzius III confirma che las capluttas da s. Sievi a Breil e s. Gieri a Schlans s'audien tier la pleiv da Breil.998
Papa Gregori V menziunescha la baselgia da s. Gieri l´emprema gada.765
Il Testament dil uestg Tello menziunescha l´emprema gada la cuort da Selauno. Tello ei staus il davos ord la renomada famiglia dils Victorins e steva en fetg bunas relaziuns cun il Convent da s. Placi e s. Sigisbert a Mustér.